უკრაინის მართლმადიდებელი ეკლესიის საპატიო პატრიარქი ფილარეტი გარდაიცვალა

უკრაინის მართლმადიდებელი ეკლესიის საპატიო პატრიარქი ფილარეტი, ხანგრძლივი ავადმყოფობის შემდეგ, 97 წლის ასაკში გარდაიცვალა.

ინფორმაცია დღეს, 20 მარტს, უკრაინის მართლმადიდებელი ეკლესიის წინამძღოლმა, მიტროპოლიტმა ეპიფანემ სოციალური ქსელის მეშვეობით დაადასტურა. როგორც ირკვევა, იერარქის ჰოსპიტალიზაცია ქრონიკული დაავადებების გამწვავების გამო გახდა საჭირო, რის შემდეგაც მისი სიცოცხლის შენარჩუნება ვერ მოხერხდა. მიტროპოლიტმა ეპიფანემ სრულიად უკრაინის მრევლს განსვენებულის სულისთვის ლოცვისა და მისი ღვაწლის დაფასებისკენ მოუწოდა.

აღსანიშნავია, რომ პატრიარქი ფილარეტი ათწლეულების განმავლობაში უკრაინული მართლმადიდებლობის ერთ-ერთი ყველაზე გავლენიანი და არაერთგვაროვანი ფიგურა იყო. იგი წლების განმავლობაში უკრაინის მართლმადიდებელ ეკლესიას - კიევის საპატრიარქოს ხელმძღვანელობდა და მოსკოვისგან ეკლესიის დამოუკიდებლობისთვის ბრძოლის მთავარ სიმბოლოდ მიიჩნეოდა. პარალელურად, მნიშვნელოვანია ითქვას ისიც, რომ 2018 წლის უკრაინის ეკლესიის გაერთიანების კრებისა და უკრაინის მართლმადიდებელი ეკლესიისთვის ავტოკეფალიის ტომოსის გადაცემის შემდეგ, მისმა როლმა ახალ საეკლესიო სტრუქტურაში არაერთი საჯარო დისკუსია და დაპირისპირება გამოიწვია.

შეგახსენებთ, რომ მსოფლიო პატრიარქ ბართლომეოს მიერ უკრაინის ეკლესიისთვის ავტოკეფალიის მინიჭების შემდეგ, ფილარეტმა საპატიო პატრიარქის ტიტული მიიღო. მისი მოღვაწეობა მოიცავდა როგორც რელიგიურ, ისე პოლიტიკურ ასპექტებს. სიცოცხლის ბოლო წლებში იგი კიევის საპატრიარქოს ტრადიციების შენარჩუნებასა და ეკლესიის ერთიანობის აუცილებლობაზე ხშირად საუბრობდა. არსებული ინფორმაციით, დაკრძალვის ცერემონიალთან დაკავშირებულ დეტალებს უკრაინის მართლმადიდებელი ეკლესიის სინოდი უახლოეს პერიოდში ოფიციალურად გამოაქვეყნებს.