ტელესერიალ "თეირანის" პროდიუსერი ათენში სასტუმროში მკვდარი იპოვეს

ტელეპროდიუსერი დანა ედენი, რომელიც ისრაელის პოპულარული ჯაშუშური ტრილერის, „თეირანის“ თანაავტორია, ათენის ცენტრში, სასტუმროს ნომერში მკვდარი იპოვეს - ამის შესახებ 16 თებერვალს საბერძნეთის პოლიციამ AFP-ს აცნობა.

52 წლის ისრაელის მოქალაქის ცხედარი კვირას, გვიან ღამით, საბერძნეთის დედაქალაქის ცენტრში, სინტაგმას მოედნის მახლობლად, სასტუმროს ნომერში იპოვეს, განაცხადა სამართალდამცავმა ორგანომ.

„დანიშნულია გაკვეთა, შემოწმებულია სათვალთვალო კამერები და
ყველაფერი მიუთითებს, რომ ეს თვითმკვლელობა იყო“, - თქვა პოლიციის წარმომადგენელმა.

ედენი ათენში 4 თებერვალს ჩავიდა სერიალის მეოთხე სეზონის გადასაღებად, რომელიც Apple TV-ზე გადის.

„ეს ღრმა ტკივილია ოჯახისთვის, მეგობრებისა და კოლეგებისთვის“, - ნათქვამია მის კომპანია Donna and Shula Productions-ის განცხადებაში.

კომპანიამ განაცხადა, რომ ჭორები, რომლებშიც გამოთქმულია ვარაუდები, რომ მისი სიკვდილი დამნაშავეობრივი ქმედების შედეგი იყო ან მის ეროვნებას უკავშირდებოდა, „არასწორი და უსაფუძვლოა“.

„ჩვენ ვითხოვთ, რომ დანას ღირსება და მისი საყვარელი ადამიანების პირადი ცხოვრება დაცული იყოს“, - ნათქვამია განცხადებაში.

„თეირანის“ პირველი სამი სეზონი, რომლებიც ირანის დედაქალაქში „მოსადის“ აგენტის ფარულად მუშაობას აღწერდა, ათენში გადაიღეს.

მეოთხე სეზონის გადაღებები 2023 წლის 7 ოქტომბერს ისრაელში „ჰამასის“ მიერ განხორციელებული თავდასხმებისა და ღაზის შემდგომი დაბომბვის გამო გადაიდო.

სერიალი ერთ-ერთ ყველაზე გაყიდვად საერთაშორისო ისრაელურ წარმოებად იქცა და 2021 წელს „ემის“ ჯილდო მოიპოვა საუკეთესო დრამატული სერიალის კატეგორიაში.

ისრაელის კულტურის მინისტრმა მიკი ზოჰარმა სოციალურ ქსელში დაწერა, რომ ედენი „ისრაელის სატელევიზიო ინდუსტრიის ერთ-ერთი ყველაზე ცნობილი და გავლენიანი პროდიუსერი“ იყო.